კიდევ დიდხანს ვიცხოვრებთ ბნელეთში?

არ ვიცი,უყურეთ თუ არა იმედზე გასულ “სპეციალურ რეპორტაჟს”, სადაც გავიდა ქრონიკის იმიტაცია,რომელიც ასახავდა შესაძლო საშინელ მომავალს.მოკლედ,რა ხდებოდა : მოვედი სახლში,ჩავრთე ტელევიზორი და ვუყურებ ქრონიკას,სადაც აცხადებენ,რომ რუსული ჯარები შემოვიდნენ,დაბომბილია სტრატეგიული ობიექტები,მოკლულია პრეზიდენტი,დაიწყო ომი,მოხალისეებს ურიგებენ იარაღს და ასე შემდეგ. გადაცემას არ ჰქონდა არანაირი ნიშანი,რომ ის არ ასახავდა სინამდვილეს და იყო იმიტაცია. ალბათ ადვილი წარმოსადგენია,რა დამემართებოდა. ტელეფონები გაითიშა, ქუჩაში ხალხი დაპანიკებული გამოვარდა,დედაჩემს წნევამ აუწია, თან ყველაზე უარესი : ჩემი მეგობარი არის ფეხმძიმედ და არ უყურებდა იმედს.მე მივწერე,რომ ომი დაიწყო და ტყუილად დავაპანიკე.წარმოიდგინეთ,ფეხმძიმე გოგოს რამე რომ მოსვლოდა !

მოკლედ,იმ მდგომარეობას,რომელშიც ვიმყოფები,აღშფოთებული აღარ ჰქვია. ის ,რაც დღეს ტელეკომპანია იმედმა ჩაიდინა, არ  იყო უბრალოდ ჟურნალისტური ეთიკის დარღვევა.ეს იყო სრული სიბნელე,უვიცობა და დანაშაულებრივი ქმედება. ეს არ არის ტელეკომპანია,ეს არის ქარხანა,რომელიც უშვებს ერთმანეთის მსგავს ბნელ , უნიჭო, არაპროფესიონალურ გადაცემებს,რომლებიც დაფუძნებულია დაშინების პოლიტიკაზე. სწორედ დაშინება და მოსახლეობის დაპანიკება იყო ამ სიუჟეტის მიზანი : ხალხმა კარგად უნდა დაინახოს,რა მოხდება,თუ ვინმე ხელისუფლების წინააღმდეგ ხმას ამოიღებს. როგორ არ გამოჩნდა მთელ ტელეკომპანიაში ერთი ადამიანი მაინც,რომელიც მოიფიქრებდა,რომ გადაცემისათვის რაიმე ნიშანი დაედოთ,რაც მიგვანშნებდა,რომ იმიტაციას ვუყურებდით და არა რეალობას !

მოკლედ,ტელეკომპანიამ აუცილებლად უნდა აგოს ამაზე პასუხი სასამართლოში.ბოლოსდაბოლოს,უნდა გაიგონ,რომ ცხოველების ჯოგი არ ვართ და ისწავლონ საზოგადოების პატივისცემა. მე პირადად,სრულიად დავკარგე იმედი,რომ ამ სიბნელიდან ოდესმე გამოვალთ. სანამ ჟურნალისტები ელემენტარულ პროფესიული ეთიკის წესებს მაინც არ აითვისებენ,პროფესიონალიზმზე აღარ არის საუბარი,მანამდე არაფერი გვეშველება.