კინოცხოვრების დასაწყისი დამოწმებული ასლებით

მე ხომ ყოველთვის ვამბობდი -ბათუმი მაგიური ქალაქია.

მაგიაა,აბა რა არის,რომ ასეთი მშვიდი სექტემბერი დგას,უზომოდ თბილი საღამოა, ჩაბნელებულ კინოდარბაზში ზიხარ და აბას კიაროსტამის ფილმს უყურებ.

კინოფესტივალის გახსნაში მაგიური არაფერი ყოფილა.ზუსტად ისე იყო ყველაფერი,როგორც უნდა ყოფილიყო,თავისი შრიალა კაბებით,ფრანგული პარფიუმითა და მაღალი ქუსლებით. სამაგიეროდ,კიაროსტამიმ იჯადოქრა ცოტ-ცოტა.

“before sunset” გიყვართ? მე ვერ ვიტყვი,რომ მიყვარს,მაგრამ ერთადერთი,რაც ამ ფილმში მიზიდავდა,ფორმა იყო. არანაირი “ექშენი” და განსაკუთრებული სიუჟეტი,მხოლოდ დიალოგები და ემოციები. დაახლოებით იგივე ხდებოდა “დამოწმებულ ასლებში” . მაგრამ თუ თქვენც ჩემსავით გაღიზიანებთ ჯული დელფის ინტელექტუალური გამოსვლები და ღრმადფილოსოფიური,წმინდა ევროპული მონოლოგები,მაშინ “დამოწმებული ასლები ” თქვენი კინო ყოფილა,აქ მსგავსსაც ვერაფერს ნახავთ.

თითქოს ისეთი განსაკუთრებულიც რა ხდება – საშუალო ასაკის კრიზისი,გაცივებული ურთიერთობები,სხვადასხვა ენაზე მოლაპარაკე ქალი და კაცი. ქალი,რომელიც ქმრის ენაზე ლაპარაკობს და კაცი,რომელიც ცოლს მხოლოდ საკუთარ ენაზე ესაუბრება. ამბავი ყოვლად ბანალურია – მათ ერთმანეთის არ ესმით.მაგრამ მთავარი ინტრიგა ზუსტად ამ ამბავშია,თამაშში,რომელსაც ეს ქალი და კაცი ერთმანეთს ეთამაშებიან.

მე არ მიყვარს,როცა მორალს მიკითხავენ,ან მმოძღვრავენ,როგორი არ უნდა გავხდე. მომეჩვენა,რომ ფილმს ზუსტად ამ მორალისტობის ელფერი დაკრავდა.სამაგიეროდ, ეს კინო ყველასია. ყველა ცოლ-ქმრის,ყველა მომავალი ცოლ-ქმრის,ყველა გოგოსი,ყველა ბიჭის. დედების და მამებისაცაა,შვილების – მით უფრო .

სავარაუდოდ,აბას კიაროსტამის ძალიან უნდა უყვარდეს ინგმარ ბერგმანი.კამერა დიდხანს ჩერდება სახეებზე,ახლო ხედით. სამწუხაროა,რომ ჟულიეტ ბინოში არც ლივ ულმანია და არც ინგრიდ ბერგმანი, ერთი ფლეგმა ქალია,რომლის გამომეტყველებითაც ვერასდროს ვხვდები,იცინის თუ ტირის. არა,ნუ იფიქრებთ,რომ რადგან გვახარია მიყვარს,ჟულიეტ ბინოშს ვერ ვიტან, ეს სულაც არაა ასე. პირიქით,მე არც მისი კოპწიაობა მაღიზიანებს ,არც მისი “ბურჟუაზიის მოკრძალებული ხიბლი” და არც უზომო პოზიტივი თვალებში. უბრალოდ,ხომ არის ტიპაჟები,რომლებიც ამ ქალმა არ უნდა ითამაშოს. არ უნდა ეთამაშა ” ლურჯში” და “ზიანში” . მე თუ მკითხავთ,არც ” დამოწმებულ ასლებში” იყო მისი ადგილი. ნახეთ და თავად გადაწყვიტეთ 🙂

მე კი,მე ზუსტად ვიცი,როგორი არ უნდა გავხდე კრიზისულ ასაკში, მაგრამ იქამდე ჯერ დიდი დროა. მანამდე გავალ,დაცარიელებული ბულვარით,შემოდგომით,ნამდვილი ბათუმური წვიმით და მაგიით დავტკბები.