მამაჩემისთვის

მამა

ვიცი,ჩემ ბლოგზე დაიპარები და ამიტომ,აქ გეტყვი იმას,რისი თქმაც შენს ყოველ დაბადების დღეზე კი არა,ყოველ დანახვაზე მინდა,მაგრამ აბა,წარმოიდგინე,რომ დავდგე და ამეების თქმა დავიწყო,რა სასაცილო იქნება. დაწერილი კიდევ აღარ არის სასაცილო .

მა,გილოცავ დაბადების დღეს. საჩუქარს ვერ გჩუქნი,ფული არ მაქვს და შენივე საჩუქრისთვის შენ ხომ არ გამოგართმევ 🙂 სამაგიეროდ,საჩუქრის მაგივრად,გეტყვი,რომ თავი ყველაზე იღბლიან გოგოდ მიმაჩნია,მე ხომ ნამდვილი კეთილი აიბოლიტის შვილი ვარ.

მადლობა იმისთვის,რომ მთელი ცხოვრება ჩემით ვწყვეტ,რა ჩავიცვა,სად წავიდე,რომელზე გავიდე და რომელზე მოვიდე და საერთოდ,როგორი ვიყო

მადლობა,რომ არასდროს შეგიშლია ხელი შეცდომების დაშვებაში.

მადლობა,რომ განა მარტო ყველაფრის ნებას გვრთავ,თან ცდილობ,ეს “ყველაფერი” გაიგო,მიიღო და შეიყვარო

მადლობა,რომ ყველა პირსინგზე მეუბნებოდი ხოლმე,როგორ გიხდებაო,თუმცა ხომ ვიცი,სულაც არ მოგწონდა

მადლობა,რომ თმის გადასაპარსად შენ წამიყვანე. იმ დილით რომ არ გეთქვა,სანამ ახალგაზრდა ხარ,ყველაფერი უზომოდ მოგიხდება და თუ ასე გინდა,გადაიპარსეო,მე კიდევ ასი წელი ვიყოყმანებდი,მერე ამდენ ყოყმანში დავბერდებოდი და აღარც მომიხდებოდა. ვერ წარმოიდგენ,იმ დილით როგორ დაგაფასე

მადლობა,რომ შემიძლია,ღამის სამ საათზე დაგირეკო,გაგაღვიძო და რომელიმე პაბიდან ჩემი წამოყვანა გთხოვო,მარტო იმიტომ,რომ მსოფლიოში ყველაზე უნამუსო შვილი ვარ,რომელსაც ტაქსისთვის ხელის აქნევაც კი ეზარება.

მადლობა იმისთვის,რომ ღამის 2-ზე რომ ავდგე და ჩაცმა დავიწყო,იმას კი არ მეტყვი,რატომ და სად მიდიხარო,ადგები და მანქანას გამოიყვან,ამ შუაღამისას მარტო ხომ არ იბოდიალებო.

მადლობა,რომ ჩემი თავისუფლება უსაზღვროა,ომდენად უსაზღვრო,რომ ხალხს არ ჯერა და ჰგონიათ,ვაჭარბებ.მეც აღარაფერს ვამბობ შენზე,დაუჯერებელი მამა ხარ და ამის მტკიცება მეზარება,ჯერ რა საჭიროა და მერეც,ხომ იცი,რა ზარმაცი ვარ.თან ვინც გვიცნობს,ისედაც გვიცნობს 🙂 საერთოდ,შენზე თითქმის არასდროს ვლაპარაკობ.

მადლობა,რომ ჩემი ცხოვრება ჩემი ცხოვრებაა,ჩემი გადაწყვეტილებები – ჩემი გადაწყვეტილებები და არასდროს მცდელობაც კი არ გქონია,რამე აგეკრძალა ან დაგეშალა,ან აზრი შეგეცვლევინებინა. მადლობა,რომ არ ვიცი,რას ნიშნავს ფრაზა ” არ წახვალ”, “არ ჩაიცვამ”, “არ გააკეთებ” .იცი,შენ ერთადერთი ადამიანი ხარ ჩემ ცხოვრებაში,ვინც შეიძლება აზრი შემაცვლევინოს ხოლმე,მაგრამ არასდროს სარგებლობ ამ პრივილეგიით .

მადლობა,რომ არასდროს გეზარება ჩემთან პოლიტიკაზე და ლიტერატურაზე კამათი.მადლობა,რომ ყოველთვის მეთანხმები,მაგრამ ამას არასდროს იმჩნევ,რა სასაცილო ხარ ხოლმე ამ დროს 🙂

მადლობა ჩემი ჯანსაღი და ლიბერალური შეხედულებებისთვის,შენი დამსახურებაა.

მადლობა იმისთვის,ერთხელ მანქანაში რომ მითხარი,რა მნიშვნელობა აქვს,მუსულმანი ბიჭი გეყოლება გვერდზე,ბუდისტი თუ იეჰოვას მოწმე,მთავარია ბედნიერი იყოო. ვერ წარმოიდგენ,როგორ გამიხარდა.

მადლობა,რომ სულ გვეუბნები,რომ თუ რაღაცა გაგვაბედნიერებს,ეს რაღაც უნდა გავაკეთოთ და არავის აზრებს ყურადღება არ მივაქციოთ.

იმაზეც მადლობა, ცოტა ხნის წინ რომ მითხარი,არც იმას აქვს მნიშვნელობა,გარეგნობით და მატერიალური მდგომარეობით როგორი იქნება,მთავარია,შენ იყო ბედნიერადო

მადლობა,რომ მთავარია,მე ვიყო ბედნიერად.

მადლობა,რომ ყოველთვის გვენდობი და არასდროს გაღელვებს,რას იფიქრებს ხალხი,მთავარია,ჩვენ ვიყოთ ბედნიერად.

მადლობა,რომ ჩვენი ყველაზე უაზრო ახირებები შენთვის წმინდათაწმინდაა და ახირებები უნდა შესრულდეს.

მადლობა,რომ შენს იმედებს და სურვილებს არასდროს მახვევ თავზე და ცდილობ,ეს ზედმეტი ტვირთი ამარიდო. მე ამას ვხედავ და გული მიჩუყდება ხოლმე 🙂

მადლობა ყველა იმ ოჯახური ექსკურსიისთვის,შენ რომ ძეგლების ისტორიას გვიყვები და მე და თამთა არასდროს გისმენთ ხოლმე:)

მადლობა,რომ გვიხარია – ვლაპარაკობთ,გვწყინს – ვლაპარაკობთ, ბედნიერები ვართ – ვლაპარაკობთ,ვლაპარაკობთ,ვლაპარაკობთ.,,

მადლობა,რომ მიუხედავად უზომო დაღლილობისა,ჩვენი მოსმენის თავი ყოველთვის გაქვს.

მადლობა,რომ ჩემი წარმატებები იმდენად გიხარია,თავი მართლა მნიშვნელოვანი მგონია ხოლმე და ბოდიში,რომ იმდენად უნამუსო ვარ,მოყოლაც კი მეზარება და ორი სიტყვით გეუბნები.

მადლობა დდტ-სთვის,ლურსმანას თავგადასავლისთვის და ბეჭდების მბრძანებლისთვის.

მადლობა,რომ ის ვარ,რაც ვარ ,ასეთი მოგწონვარ და არასდროს გეზარება იმის გამეორება,რა ლამაზი და ჭკვიანი ვარ და ღმერთის უმადური,რომ ამას არ ვაფასებ .

მადლობა,რომ ენა არასდროს მოგიჩლექია,პატარა ბავშვივით არასდროს მოგიმართავს და არც დაგიყვირია. კიდევ იმისთვისაც მადლობა,რომ ვიცი – ნამდვილი მამაკაცები არ იგინებიან,არ უხეშობენ და ცხოველებივით არ თვრებიან.

მადლობა,რომ ყველაზე მთავარი მომეცი – თავისუფლება და დამოუკიდებელი არჩევანი.

მა,მინდა,რომ ბედნიერად და კარგად იყო და არაფერზე ნერვიულობდე. ჩვენ არ განერვიულებთ მგონი,არასდროს გაგვიბრაზებიხარ,ეე,შენც როგორ გაგიმართლა 🙂

ყველაზე მნიშვნელოვანი ადამიანი ხარ ჩემთვის და ყველაზე მაგარი ტიპი,ვინც კი ოდესმე შემხვედრია 🙂

ხეფი ბიორსდეი,მამა