ლუმოს !- რამდენიმე პრაქტიკული შელოცვა

ჰარი პოტერის ვინაობა ალბათ ყველამ იცით. ეს ის ბიჭია,შუბლზე ნაიარევი რომ აქვს და სათვალეს ატარებს. ხო,ზოგჯერ ჯადოქრობს კიდეც.

ჩემი ერთ-ერთი ეკლესიური მეგობრის სიტყვების თანახმად,საპატრიარქო არ გვირჩევს იმ წიგნის წაკითხვას ,რომელიც ამ სათვალიანი ბიჭის ამბავს გვიყვება. ამავე მეგობარმა გუშინ განაცხადა,რომ თვითონ ამ “ჯადოქრულ ნაწარმოებს ” არასოდეს წაიკითხავს. მას შეუძლია ეს პოსტიც არ წაიკითხოს. თქვენ კი,ვისაც არ გაშინებთ ჯოჯოხეთური სასჯელი ან თქვენი მოძღვრის რისხვა,რამდენიმე სასარგებლო და პრაქტიკულ შელოცვას გასწავლით, პირდაპირ ჰოგვორტსიდან.

ვიდრე შელოცვების სწავლას დაიწყებდეთ,აუცილებლად დაგჭირდებათ ჯადოსნური ჯოხი. ჩვენთან მსგავსი ნივთის შოვნა არც თუ ისე ადვილია, ამ ქვეყანაში მკაცრად კონტროლდება ჯადოსნური ნივთების ექსპორტ-იმპორტი. ამიტომ ჯოხის დამზადება თავად მოგიწევთ. ბევრი არაფერი უნდა. ცოტა ხნით მოშორდით კომპიუტერს,გადით ხეებიან ადგილას,პარკში,ქუჩაში,მოძებნეთ წვრილი,გრძელი ტოტი და გამოთალეთ. თქვენი ჯოხი მზადაა.

ახლა კი რამდენიმე შელოცვა,რომელიც ძალიან გამოგადგებათ ცხოვრებაში. ჰარის და მე ძალიან გვადგება.

1) ლუმოს! – მაინც ოთხმოცდაათიან წლებში გაიარა ჩემმა ბავშვობამ და ეს შელოცვაც ყველაზე მეტად მიყვარს. ამ სიტყვის წარმოთქმისთანავე თქვენი ჯოხის წვერი აინთება. ნეტავ ადრე მცოდნოდა,ლამფის სუნი აღარ შემაწუხებდა და გაკვეთილების მომზადებისასაც არ დავითხრიდი თვალებს.

2) ვინგარდიუმ ლევიოსა – გარდა იმისა,რომ ლამაზად ჟღერს,საგნებს აიძულებს ,იფრინონ.

3) აკციო- თქვენსკენ მოიზიდავს იმ ნივთს,რომელიც გჭირდებათ. ამისათვის “აქციოსთან” ერთად უნდა წარმოთქვათ საგნის სახელი. ახლა თქვენი მიკარგული მობილურის ძებნა აღარ მოგიწევთ,იტყვით “აკციო მობილური” და ტელეფონიც მაშინვე მოფრინდება თქვენთან.

4)ალოჰომორა! – შელოცვა,რომელიც აღებს კლიტეებს და დაკეტილ კარებს. ბოროტად ნუ გამოიყენებთ,თუ ჯადოქრობაა,კეთილი ჯადოქრობა იყოს.

5) ექსპელიარმუს! – ეს განმაიარაღებელი შელოცვაა. კერძოდ,თუ ქუჩაში დაინახავთ,რომ ვინმე ჯოხს გიმიზნებთ და რაღაცას ბუტბუტებს,მითუმეტეს,თუ ეს “ვინმე” თქვენი მტერია,მაშინვე წარმოთქვით ეს შელოცვა,მიუშვირეთ მას თქვენი ჯოხი და თავად დატოვეთ ჯოხის გარეშე.

6)აგუამენტი- ამ შელოცვით შეგიძლიათ შექმნათ ჩვეულებრივი,სასმელი წყალი. განსაკუთრებით გამოსადეგი შელოცვა ლაშქრობების მოყვარულთათვის. ახლა აღარ მოგიწევთ იმაზე ზრუნვა,რომ წყაროსთან ახლოს დაბანაკდეთ.

7)რეპარო – შესაძლებელია შეაკეთოთ დაზიანებული საგნები. საყოფაცხოვრებო შელოცვის შესანიშნავი ნიმუში 🙂

8)ექსპექტო პატრონუმ- ჩემი საყვარელი შელოცვა. ამ შელოცვით შესაძლებელია თქვენი პატრონუსის გამოძახება. პატრონუსის ვინაობა და მისი შექმნის წესი შეგიძლიათ ისწავლოთ ჰარი პოტერის შესახებ წიგნების მე-6 და მე-7 ნაწილიდან. ჩემი პატრონუსი არის ცისფერთვალა ციმბირული ჰასკი,ძაღლი.

ეს არ არის შელოცვების სრული ჩამონათვალი,მაგრამ პრაქტიკულ ცხოვრებაში ყველაზე გამოსადეგად 8 შელოცვა მივიჩნიე და ამოვარჩიე. თუ თქვენ გსურთ,გასცდეთ ყოველდღიურ ყოფა-ცხოვრებას და გახდეთ ნამდვილი ჯადოქარი,მაშინ შეგიძლიათ,თავადაც აითვისოთ დანარჩენი შელოცვები,ან სულაც ჰოგვორტსში ჩააბაროთ,იქ მართლაც შესანიშნავი ლექტორები ჰყავთ.

ჩემი საყვარელი შელოცვა აკრძალული შელოცვაა. ავადა კედავრა- იწვევს დაუყოვნებელ სიკვდილს.

თუ თქვენ ყველა რჩევა შეასრულეთ და მაინც არცერთი შელოცვა არ გამოგდით,მაგლი ყოფილხართ,ყოველგვარ ჯადოსნურ უნარს მოკლებული ადამიანი. ამიტომ ისღა დაგრჩენიათ,ეგ გამოთლილი ჯოხი გადააგდოთ,ამის შემდეგ მარტო მწვადის ასაგებად თუ გამოგადგებათ.